Spaanske regio Asturias stipet Liet International

De Spaanske regio Asturias sil de Fryske stichting Liet International de kommende trije jier stypje mei in bedrach fan 10.000 euro it jier. De Asturyske minister fan taal en kultuer, Consuelo Vega Diaz, en Stichting Liet International binne dat oerienkommen yn de Asturyske haadstêd Oviedo. Nei de provinsje Fryslân is Asturias de twadde regio dy’t besletten hat om Liet International struktureel te subsidiearjen. ,,Wy fine Liet International hiel belangryk foar de promoasje fan muzyk yn it Asturysk en oare minderheidstalen. It is in moai evenemint, dat neffens ús de kommende jierren noch fierder groeie kin’’, seit frou Vega Diaz oer Liet International. De Asturyske minister wie yn oktober 2009 oanwêzich by Liet International yn Ljouwert mei in stevige Asturyske delegaasje en wie doe tige te sprekken oer it evenemint.

De oerienkomst tusken Asturias (yn it Asturysk: Asturies) en Liet International hâldt yn dat Asturias de kommende jierren fersekere is fan in plak yn de finale fan Liet International foar de winner fan it Asturyske sjongfestival Premiu al Meyor Cantar. Dat festival waard it ôfrûne wykein yn it berchstedsje Mieres wûn troch de groep Xera mei it liet Tierra. Onno Falkena siet yn de sjuery fan it Asturyske sjongfestival út namme fan Stichting Liet International.
Xera is de earste dielnimmer fan Liet International 2010 dy’t bekend is. De oare dielnimmers wurde pas yn de rin fan dit jier bekend makke. Ien dêrfan is fansels de winner fan it Fryske sjongfestival Liet 2010 op sneon 22 maaie.

In twadde diel fan de oerienkomst tusken Asturias en Stichting Liet International is dat de Noard-Spaanske regio graach de kâns hawwe wol om Liet International te organisearjen yn it jier 2012. Dit diel fan de oerienkomst betsjut dat de takomst fan it sjongfestival foar minderheidstalen der goed útsjocht. De earstfolgjende edysje fan it sjongfestival is op sneon 20 novimber yn it Skotse Inverness. Foar 2011 is Udine yn Noard-Italië de wichtichste gadingmakker en yn 2012 sil Asturias Liet International ûntfange. De krekte lokaasje is no noch net bekend, mar de kâns is grut dat dat it teater fan havenstêd Gijon (yn it Asturysk: Xixon) wurdt.

De delegaasje fan Stichting Liet International yn Asturias bestie út festival-koördinator Onno Falkena en produsint Jan Gaastra.

De winners fan Liet Ynternasjonaal 2009

De sjuerypriis fan Liet Ynternasjonaal is wûn troch:

Somby

Winner Publykspriis:

Dr. Drer en crc Posse

Wolkom op de website fan Liet Ynternasjonaal

Liet Ynternasjonaal is it ynternasjonale sjongfestival foar it bêste nije liet yn in Europeeske minderheidstaal. Liet Ynternasjonaal is yn 2002 yn Fryslân betocht en ûntwikkele. It doel wie om, nei tsien suksesfolle edysjes fan it Fryske liet, eigentiidske bands dy’t yn in minderheidstaal sjonge in poadium te bieden. Yn sân jier tiid is Liet Ynternasjonaal útgroeid oant in alternative wjergader fan Eurovisie, mei dat ferskil dat sjonge yn it Ingelsk by Liet ferbean is. Liet Ynternasjonaal is hjoeddedei ek ien fan de grutste eveneminten foar de promoasje fan minderheidstalen. Liet Ynternasjonaal wurdt organisearre troch de Fryske Stichting Liet International yn oparbeidzjen mei bûtenlânske partners út Skotlân, Skandinavië, Itaalje en Spanje.

Sjongfestival Liet Ynternasjonaal is op sneon 31 oktober foar it earst sûnt fiif jier wer yn Ljouwert te bewûnderjen. Nei twa edysjes yn Sweedsk Laplân yn 2006 en 2008 komt it festival werom nei stedsskouboarch De Harmonie.